Munch Now

一早係大埔墟發現呢間新西餐廳－Munch Now。

被木框包圍既落地玻璃門與周邊小型家用店格格不入，尤其左右兩邊街都係街市，顯得更別樹一格更吸引。
終於有幾會同媽咪同Mr.C試下午餐。

店內紅磚牆同天花配著彷爉燭既燈，加上彷皮座椅，簡潔既古歐式風格。
設計色調同燈光偏暗，但日頭充足既陽光射入黎，可以想像到日夜有好大分別，我諗夜晚係度傾下計會幾舒服。
環境唔算寬敞，我地既六人桌坐位其實幾舒適，反而望到每張枱之間既走廊會令人覺得迫澀。

餐牌唔少選擇，午餐同全日供應近二十款，都係soup of the day & coffee or tea。

本身心思思想食carbonara penne（約$50），又想要焗海鮮飯（約$60），不過最後揀左煙三文魚闊麵，約$70。

熱愛生煙物既我，一塊煙三文魚實在唔夠喉，而出奇地無其他食材配搭下，香草同橄欖油好香！

醬汁唔算多，但每條麵都剛好均勻沾上，食落幾吸引！

至於佢地就二話不說咁比個約$50既西冷扒吸引左，分別配薯菜同白飯。

我試左幾啖，老實講，唔好食。

（無講明既情況下）約八成熟，欠缺牛味，肉質嫌韌，亦好乾身；可以請侍應再另上醬汁（免費）。

薯菜係粗身薯條同數粒疏菜，薯條唔係即炸，上碟前都無翻炸，而且已經放到只有微暖。

成份野都好令人失望。

總括黎講，鋪名幾好，”Munch Now”，意思係好味到大大啖食，可惜事實食物質數一般。

”Munch”，重有另一個意思：零食。

比我揀，如果只係食左個麵而無試到d肉，我會肯定話可以返黎食，因為連餐湯（是日羅宋湯）既味道都好適中。

可惜目前唔會再特登去，至少唔會係度享受一個正式既晚餐。

如果經過大埔墟又想食平價西餐可以考慮下，當一份零食。

下次會想試下個焗豬扒飯同pizza，因為見隔離枱點呢兩樣野勁多cheese又香!

服務一般，毫無笑容但有禮貌。

反應唔夠主動，我地入到門口到走近個位先有人留意，不過都急步迎上set枱、

侍應攞menu過黎係默默咁放係我地對面，而唔係直接比我地或放到面前。

我諗主要係分工混亂，大家好忙碌，好似無指定崗位咁。

有樣野要讚：我同Mr.C先入座等我媽，呆坐大概十幾分鐘，無追過我地落單，唔會比人感覺趕急。

所以，唯一最好就係你可以大安旨意慢慢食、慢慢傾。