大盛日本料理

前幾日係新蒲崗亂行，臨時上網搵邊度dinner，想食sushi但選擇唔多，大盛日本料理好似好受歡迎，就去試下啦！

一入門就覺得有點壓迫感，侍應話入面有卡位，不過見d枱擺得咁密已經唔想行入去，所以決定坐門口位。

雖然對正門口又拍住收銀，但應該係我眼見唯一最「獨立」既座位。

魚生有厚度，食材尚算新鮮。以價錢而言，算抵食。

手工一般，兩種三文魚我分別食到一條小刺同一片魚鱗（Mr.C食果兩件又無問題）。

火炙三文魚醬油漬壽司，睇佢燒得唔夠「火炙」，但望落又好似成舊熟左，咬落原來係上熟下生，口感有驚喜。如果燒得靚d會更吸引。

Munch Now

一早係大埔墟發現呢間新西餐廳－Munch Now。

被木框包圍既落地玻璃門與周邊小型家用店格格不入，尤其左右兩邊街都係街市，顯得更別樹一格更吸引。
終於有幾會同媽咪同Mr.C試下午餐。

店內紅磚牆同天花配著彷爉燭既燈，加上彷皮座椅，簡潔既古歐式風格。
設計色調同燈光偏暗，但日頭充足既陽光射入黎，可以想像到日夜有好大分別，我諗夜晚係度傾下計會幾舒服。
環境唔算寬敞，我地既六人桌坐位其實幾舒適，反而望到每張枱之間既走廊會令人覺得迫澀。