新手機實際上手用左兩日，頭先就好可憐被我滑手跌左落地啦！！好彩無事，真係嚇死我呀！即刻打比Mr.C say sorry，佢一估就話「部電話爛左呀？」。雖然無話我，重叫我小心d，又肯買過張新mon貼（一跌就花左），但其實我知道佢好肉赤。
最深刻，有次我將部單反放係座位後面，跟手又放左袋野。起身果陣，只掛住拎起袋野，完全忘記左相機既存在！！！結果成部機跌落地，撞鬆左個閃光燈，唔識彈上黎。我不停抱歉，Mr.C重安慰返我轉頭：「唔緊要啦，好小事！反正都用左好耐啦。」
記得起初我話過，「一部單反比普通數碼相機都係差幾千蚊，唔夠錢，儲多幾個月都買到，點解d人成日覺得單反好勁好貴？」，佢就話：「幾千蚊呀！好貴ga la！一個月幾錢人工，唔係個個都有多餘錢買相機，對好多人黎講係奢侈品。」到依家，每次望到部機我都好內疚，個心都會碎一碎，因為知道佢一定好心痛；因為果部相機係佢少有既奢侈品。
我諗可能係我同佢世界既出入，所以每當係佢身邊做錯一件事時，我都會特別內疚、罪惡感特別重，尤其係整壞左佢既野／佢送比我既野。同佢一齊呢幾年，由生活到行為到思想，真係改變左好多，可惜重有好多壞習慣，成日一時忘形。幸好Mr.C有超級廣闊既胸襟同耐心，不斷接納我、教導我，唔明講到我明，不停重覆去分析。趺野方面，佢已經等左兩部電話既時間，雖然有進步，但太慢啦！真希望我同呢部呀三唔會再令佢失望。
「為幸福而改變，要進步，加油！」
No comments:
Post a Comment