大盛日本料理

前幾日係新蒲崗亂行，臨時上網搵邊度dinner，想食sushi但選擇唔多，大盛日本料理好似好受歡迎，就去試下啦！

一入門就覺得有點壓迫感，侍應話入面有卡位，不過見d枱擺得咁密已經唔想行入去，所以決定坐門口位。

雖然對正門口又拍住收銀，但應該係我眼見唯一最「獨立」既座位。

魚生有厚度，食材尚算新鮮。以價錢而言，算抵食。

手工一般，兩種三文魚我分別食到一條小刺同一片魚鱗（Mr.C食果兩件又無問題）。

火炙三文魚醬油漬壽司，睇佢燒得唔夠「火炙」，但望落又好似成舊熟左，咬落原來係上熟下生，口感有驚喜。如果燒得靚d會更吸引。

吉列拼盤有蝦、魚柳、帶子同蠔。即炸，外脆內熱。推介！

最欣賞魚柳，大部份炸魚都會偏亁身，但呢個好滑好香。

另外，好多餐廳怕蠔會過熟，落油一陣就撈起，好多時隻蠔只係半暖，呢度出奇地熱得黎又唔會太熟。幾好！

鰻魚炒飯，完全無鰻魚飯既惹味，食落口唔難食亦唔算好食。

飯粒較淋同太黏，鰻魚細粒又少。下次唔會encore。

掛住傾計，無咩特別留意地方同服務，不過我會想再去。

That’s all:)